食盡觀塘 – 高質西班牙小食 橡果級黑毛豬非一般叉燒

成日去東廣場食飯都見到呢間小食坊坐滿人,原來呢個小食坊真係非一般小食坊,賣既係高質西班牙野食,唔怪得成日都咁多人。

外面已經見到好多唔同既酒放左係度,可以一路嘆西班牙菜一邊飲杯酒同朋友傾下計,仲有隻好可愛既黑豬仔做標誌。

入面有幾張枱可以坐,再入啲仲有一個小房仔提供私人空間,除左入面之外,外面都有一啲高枱位可以坐。

店入面除左有大大個標誌之外,仲有幾個好可愛既標貼,寫住左佢地用既肉都係無抗生素無重金屬無激素無基因改造無農藥。

西班牙最正既緊係有火腿,見到櫃入面一隻隻西班牙國寶黑毛豬火腿吊住係度真係超級吸引,而且仲要有埋證書寫明出品夠哂信心。

咁吸引緊係要叫《36個月橡果黑毛豬火腿》($65),用上左伊比利亞高原以橡子餵養既豬夠正宗同最好食,食落咸香味十足油脂豐富。

食完前菜就叫左個湯,《黑毛豬羅宋湯》($48)個湯底幾濃,入面仲加入左黑毛豬火腿同黑毛豬肉一粒粒咁更有口感夠足料。

叫左幾串串燒,《一口牛串燒》($45)一口牛配上左烤過既青椒,燒到中間嫩紅肉味濃,《黑毛豬爽梅肉串燒》($35)同《黑毛豬肋肉串燒》($35)都燒到酒脂勁豐富,每串都有加上唔同既香口椒類加上爽口既口感。

食得多肉都要食下蔬菜,《香炒西班牙小虎皮椒》($78)用左好鮮色既三色椒見到都好開胃,小虎皮椒炒完都幾香口。

主菜既《橡果級黑毛豬極品梅頭叉燒》($168),呢個用上黑毛豬整既非一般叉燒,肉品好豐富多汁,食落較一般叉燒柔軟,再塗上蜜汁烤更入味。

店名:B&S 西班牙小食坊
地址:觀塘成業街7號東廣場地下G07號舖

即刻入去Like & Share埋我地既其他頻道:
Facebook: KJFOODLIFE飲食玩樂地圖
Instagram: KJFOODLIFE
Website: KJFOODLIFE飲食玩樂地圖
Openrice: KJFOODLIFE

歡迎合作或查詢:
Email: kjfoodlife@gmail.com

餐牌:

發表迴響

你的電子郵件位址並不會被公開。 必要欄位標記為 *